الي / رئيس الجمهورية عمر حسن احمد البشير (الهرجلة والاحتيال الديني)

مسجد النور فى كافوري

 الي / رئيس الجمهورية عمر حسن احمد البشير
اما بعد ..
بمناسبة زيادة زكاة المرتبات والاجور للعام 2018 م .
سيدي الرئيس ..
عايزة اتكلم معاك في موضوع الهرجلة والاحتيال “الديني” البتعمل فيهو انت وشلة الصعاليق المعاك .. ناس مجلس الشوري .. وهيئة العلماء .. ديوان الزكا .. ومجلس الإفتاء .. الحج والعمرة .. الذكر والذاكرين .. والهجرة الى الله .. وناس لا لدنيا قد عملنا .
سيدي الرئيس ..
خليك من اي حاجة .. بس عايز أسألك عن “مسجد النور ” .. او نقدر نسميهو الحرم الرابع في السودان .
حضرتك قلتا .. المسجد دا اتبنى صدقة جارية لروح المغفور له والدك الله يرحمو .. وقلتا لينا انو المسجد اتبنى بحر مالك انت واخوانك اولاد الفقيد حسن احمد البشير .. لحدى هنا ماعندنا معاك مشكلة .
المشكلة بتجي من السؤال .. جبتوا القروش من وين !!
ما كل الناس عارفة انو مسجد النور كلف اكتر من 25 مليون دولار غير سعر الارض .. مع العلم انو مساحة الارض 4200 متر مربع والمبني منها 1250 متر مربع .. اكبر من حوادث احمد قاسم واكبر من مقابر احمد شرفي زاتو .
بس عايز اعرف يا اولاد حسن احمد البشير جبتوا القروش من وين ..
قبل سنة 1989م يعني قبل الانقلاب .. مالكم مابنيتوا مسجد لي ابوكم .. خلى مسجد مالكم مابنيتوا زواية لي ابوكم المرحوم .. والله زاوية كتيرة عليكم .. مالكم ماعملتوا ليهو مزيرة وللا سبيل موية في موقف شندي .
يعني اتذكرتوا ابوكم مات سنة 2010م وجريتوا بنيتوا ليهو الحرم الرابع .. معقولة بس مسجد ابوكم يكلف 25 مليون دولار .. ياخ سيدنا ابراهيم السمانا مسلمين ما بنوا ليهو مسجد زي دا .. تجي حضرتك تسرق قروش البترول وتبني بيها مسجد ضرار لي زول مابنعرف عنو حاجة غير انو ولد لينا ” اتفه ” مخلوق يمشي على اربع .
سيدي الرئيس ..
تبيع مستشفي الخرطوم .. الكانت بتعالج نص سكان السودان علاج مجاني بحجة نقص الميزانية المخصصة للعلاج .. لكن تصرف على مسجد ابوك من قروشنا صرف بدون حساب وللا رقيب .
تفرتق مشروع الجزيرة .. وتشرد العمال .. وتبيع اصول المشروع من محالج ومستودعات .. وتبيع ارض المشروع نفسها .. لكن تجيب شركة تركية تصمم مسجد ابوك على الطراز العثماني .. وتستورد افخر الرخام والاثاث لي مسجد ابوك .. وبالعملة الصعبة كمان .. ومش كدا بس كمان تجيب شركات استشارية عالمية عشان الشغل يطلع مزبوط .. لكن احنا الشعب المسكين تجيب لينا اتفه شركة المانية تنفذ لينا سد مروي ..قبل السد ما يخلص نكتشف فيهو شرخ في جسم السد ونكتشف 9 توربينات معطلة ومابتولد كهرباء .. وبعد دا تستورد لينا كهرباء من أثيوبيا وتزيد علينا التكلفة والديون .

مسجد النور فى كافوري

مسجد .. فيهو مكيفات اسبليت شغالة اربعة وعشرين ساعة والكهرباء مابتقطع نهائي لكن الكهرباء عادي تقطع في غرفة العمليات في حوادث البان جديد وعنابر الاطفال .. فيهو حراسة على مدار اليوم .. لكن عصابات النهب والخطف حايمة في نص الخرطوم وبالنهار كمان .. فيهو موية باردة وفيهو مول سناء .. فيهو سلم كهربائي زي الصاروخ .. وسلم مطار الخرطوم معطل من يوم ركبوهو .
سيدي الرئيس .. انت فاكر هرجلتك دي بتحلك من ربنا .. اقسم بالله تجي يوم القيامة شايل مسجدك دا في ضهرك وحايم بيهو في جهنم بس قصاد زول كتلتوا بدون وجه حق .
ياخ اقول ليك شنو بس ..
‏بس نحنا مرقنا ومافي رجوع
‏ضد الفقر وضد الجوع.

⁧‫#السودان_نحوالحريه‬⁩
#اضراب_صيادله_السودان

Comments

comments

Print Friendly, PDF & Email

قم بكتابة اول تعليق

Leave a Reply

لن يتم نشر بريدك الالكتروني في اللعن