نصبر عل البوخ الغريب * نتحمل صوت القعو … التحية للحزب الشيوعي على هذه الخطوة الجسورة والنضال

التحية للحزب الشيوعي على هذه الخطوة الجسورة والنضال

وثائقيات - الحزب الشيوعي

نصبر عل البوخ الغريب * نتحمل صوت القعو
لامن نلاقي الهمبريب * والليل غناوي نولعو
يا يمة تفرحي من طرف * لمن المسافرين يرجعو
دة كأنو لا دمع انزرف * لا خيوت قلوب اتقطعو
لا شتلة لا محصول تلف * لا ناس بيوتن وقعو
بحراً بلا الخازوق زحف * نبنيلو قيف ما يطلعو
صدفتنا تبقى اخر الصدف * نمسك زمنا نطوعو
يختونا يمشو يودعو * فقراً علينا اتربعو
ديل لا بيخافو من الإله * لا بيختشو ولا بيشبعو
حقك تحرسو ولا بجي * حقك تقاوي وتقلعو
أمسك شباطينك صراع * الما بتحصلوا جدعو
ثبتلي بالك لا يلين * أنقح ترابك وازرعو
عقبال أقول إنسان حنين * ما شق حنكاً ضيعو
الضو يسأل سؤال * شن السؤالات بنفعو
ما حال غلابة * على الغلابة اتفرزعو
قسموا القليلي مع بعض * كم طمنونا وشجعو
وعلى العموم ما مر يوم * هملي ونقاراً تسمعو
واحدين يقولولك خلاص * واحدين مصرين يرجعو
الضو يقالد من طرف * قبال يقالدو يدمعو
دمع السواد الإنزرف * يا خويا تاني شن بيرجعو
في عمة في بت في ولد * في الصغيرين اليرضعو
الضو بكى بكى ما بكى* بكاهو صوت الطائرات البقلعو
بكاهو يقنع بالرحيل * بكاهو قدرتو تمنعو
من سد رمق الصغيرين الجياع * براق عيونن يشلعو
الله يجازي الكان سبب * يا الضو بيوتنا يوقعو
سرح مع الخاطر بعيد * في كوم ولاداً يقطعو
فوق البحر فوق اللجان * فوق عينا حقنا تدفعو
دقش طرف قوز الرمال * اترتع كادن عيونو يوقعو
بعد طول رجا أبونا جا * جروا كالفراشات شفعوا
أمونة صوتا من البعيد * جيب القشر دة على رفاقتو نرضعو
الضو رقد ومناهو كان * ينومو الصغيرين يهجعو
ما لقى غير انو يرحل * وقام لي أخوهو يودعو
أبقى عشرة على العقاب * شجر اليقين ما تقلعو
شيل الصبر خليك هميم * باب قناعتك أقرعو
الزول بحن حن يا ولد * حناً يقدمك اتبعو
تش عينو دجال الضلال * قبال يمدلك اصبعو
دجال الضلال سبب الفقر * يسرق قمحنا يوزعو
قاصد البحر داير يموت * لا هموماً لا معيشةً تجزعو
الضو رحل في لحظة من الزمن * ومحال الزمن لي ولادو يرجعو

Comments

comments

Print Friendly, PDF & Email

قم بكتابة اول تعليق

Leave a Reply

لن يتم نشر بريدك الالكتروني في اللعن