من طرائف النكت الحايمة الان فى الواتساب للدكتورة الفاضلة جدا سارة ابو

من طرائف النكت

 من طرائف النكت الحايمة الان فى الواتساب للدكتورة الفاضلة جدا سارة ابو
???
هذه مشكلة تخص أحد الشباب اتصل على برنامج مافي مشكلة في قناة النيل الازرق …
شوفوا المشكلة والرد عليها من د سارة ابو ..
المشكلة :
انا اسمي س م ع … وأنا شاب فى مقتبل العمر أعمل موظف بقسم الحسابات بإحدى المصالح الحكومية ومتزوج من إحدى قريباتى ولدي أربعة أطفال ، وكنت أعيش حياتي فى هدوء تام ولكن وقبل حوالي شهر من اﻵن دعاني أحد أصدقائي إلى مناسبة زواجه ، فلبيت الدعوة ، وبعد العشاء بدأ الحفل وأثناء وجودي داخل الدار وقعت عيناى على فتاة فى غاية الجمال فإرتبكت من النظرة الأولى وتصبب منى العرق رغم برودة الجو وصرت أراقبها طيلة زمن الحفل وبعد نهايته تعرفت عليها وتبادلنا الأرقام وصرنا نلتقى يوميا فى إحدى الحدائق فتبدلت حياتي تماماً وصرت أعيش فى سعادة كبيرة وعندما فاتحتها فى أمر الزواج طلبت مى أن اطلق زوجتى حتى تقبل بالزواج منى .. فماذا أفعل علماً بأننى لا أستطيع أن أفقدها فقد صارت هى كل حياتى وصرت فى حيرة من أمرى فماذا أفعل ؟؟
…….
رد الدكتورة سارة ابو :
………………….
والله أنا ذاتي إحترت فيك يازول إنت عندك أربعة شفع حب شنو تاني العليك ؟؟ وشغال موظف كمان؟ وهو نحنا ما أشتغلنا موظفين؟ ما شفنا مرتباتم والله بصراحه أنت يا حرامى يا حاوي ؟؟ وبصراحة قلبك ده بعد كده ما مفروض يدق إلا إذا هجمتك كلبه فى الشارع ، ولا يوم بالليل فتحت لقيت ليك حرامي فى نص الحوش ، لكن يدق بالحب دى غرييييبه ؟؟ وشوف بصراحة البت عرفت إنك شغال فى الحسابات وإيدك لاحقة لكن بالكتير سنة كده بتكون فى السجن .. وطبعاً هي من أول يوم إتكلمت معاك قالت ليك : معقووووله عندك أربعة أطفال ؟؟؟ أكييييد بتهزر ، تكون إنت ما متزوج أصلا؟ وطبعاً أنت تكون أتكيفت ورأسك كبر وأتخيلت نفسك (عمرو دياب) مع أنو أنت تلقاك لما (زغبير) كان حارس الهلال إنت شايل قصب سكرك وخاشى الأستاد .. وإنتو أصلكم كده يا المتزوجين ، وعندكم أطفال ، الواحد فيكم رأسمالو كلمة حلوة .. والله جنس تخلف .. وإنت ذاتك ياخى بعد ما أتعشيت وحضرت العقد تاني القاعد ليها شنو؟؟ ما تمشي تتخمد تنوم وكمان بلا خجله خشيت جوة الدار ؟؟ مشيت ترقص مش؟؟ بالله هسى فى ذمتك الراقص ليها شنو؟؟ تلقاك قروش الروضة تشيل ليها هم من شافعك فى بطن أمو .. لكن فى النهاية أنا ما بلومك .. بلوم مرتك لأنها ما شايفة شغلا معاك .. لأنو الزيك ده مفروض من يجي من الشغل يمسك الشافع الصغير وبدون بامبرز لحدي تسعة مساء .. وكيييف تخليك يومي المساء تطلع من البيت مالك ؟؟ شغال غفير ؟؟ ونصيحتى ليك يازول بطل الهبل البتعمل فيهو ده ولم مرتك وأولادك عليك .. بلا كازينو بلا كلام فارغ معاك ، هسع الدفعتها فى الحدائق دي لو لميتا مش كنت إشتريت ليك عجلة لشافعك الصغير ، وتلقاهو واقف مطير عيونو فى شفع الجيران السايقين عجلات .. ونصيحتى ليك من تجي من الشغل تلبس جلابيتك القصيرة ديك وتمسك الشفع ديل وتخلي مرتك دي تشوف مجاملاتا فى الحلة ، هسع تلقاها بى سبب حدايقك دي الناس الجو من حج السنة الفاتت لحدي هسى ما باركت ليهم .. وهسع كدي الحب خليهو وفى ذمتك آخر مرة إشتريت ليك باسطة لشفعك ديل متين؟
???

Print Friendly, PDF & Email

قم بكتابة اول تعليق

Leave a Reply

لن يتم نشر بريدك الالكتروني في اللعن