ﺭﻭﺍﻳﺔ ﺍﺳﺮﺍﺭ ﺍﻟﺰﻣﺎﻥ (الحلقة الاولى)- ﺑﻘﻠﻢ ﻃﺎﺭﻕ ﺍﻟﻠﺒﻴﺐ

طارق اللبيب

 

ﺍﻟﻘﺼﺔ ﺩﻱ ﺣﺼﻠﺖ ﺑﺪﺭﻱ ﺷﺪﻳﺪ .. ﻳﻌﻨﻲ ﻗﺒﻞ ﺍﻟﻌﻬﺪﺍﻟﺘﺮﻛﻲ ﺫﺍﺗﻮ .. ﻓﻲ ﺯﻣﻦ ﺍﻟﺴﻠﻄﻨﺔ ﺍﻟﺰﺭﻗﺎﺀ ﻳﺎﺯﻭﻝ ﺍﻟﺰﻣﻦ ﺩﺍﻙﻣﺎﻛﺎﻥ ﻓﻲ ﺣﺎﺟﺔ ﺍﺳﻤﻬﺎ ﺭﺋﻴﺲ ﺍﻟﺠﻤﻬﻮﺭﻳﺔ ﻭﺍﻟﺤﻜﻮﻣﺔ ..

ﻭﺍﻟﻤﺤﺎﻓﻆ ﻭﺍﻟﻤﻌﺘﻤﺪ ﻭﻛﺪﺍ .. ﻛﺎﻥ ﻓﻲ ﻣﻠﻮﻙ ﻭﺍﻣﺮﺍﺀ ﻭﺳﻼﻃﻴﻦ ﻭﺣﺎﺟﺎﺕ ﺯﻱ ﺩﻱ .. ﻭﻧﺴﺒﺔ ﻻﻧﻬﺎ ﺍﻟﻘﺼﺔ ﻓﻲ ﻋﻬﺪ ﻣﻤﻠﻜﺔﺳﻨﺎﺭ .

ﺍﺗﺎﻛﺪ ﺑﺎﻥ ﺍﻟﻤﻠﻮﻙ ﻭﺍﻟﺮﻋﻴﺔ ﻛﻠﻬﻢ ﻛﺎﻧﻮ ﻣﺴﻠﻤﻴﻦ .. ﻭﺍﺣﺪﺍﺙ ﺍﻟﻘﺼﺔ ﺑﺘﺪﻭﺭ ﻓﻲ ﻗﺮﻳﺔ ﺷﺮﻕ ﺳﻨﺎﺭ .. ﻭﺍﻟﻘﺮﻳﺔ ﻟﻐﺎﻳﺔ ﻫﺴﻲ ﻣﻮﺟﻮﺩﺓ .. ﻭﻧﺎﺳﻬﺎ ﻣﻦ ﺍﻃﻴﺐ ﺍﻟﻨﺎﺱ

..

ﺍﻫﺎ ﻳﺎﺯﻭﻝ ﻛﺎﻥ ﻓﻲ ﺯﻭﻝ ﻣﻦ ﺍﻋﻴﺎﻥ ﺍﻟﻘﺮﻳﺔ ﺩﻱ .. ﺍﺳﻤﻮ ﻭﺩ ﺩﺍﺭﺍﻟﺰﻳﻦ .. ﻭﻛﺎﻥ ﺭﺍﺟﻞ ﺣﻜﻴﻢ .. ﻭﻋﻨﺪﻭ ﺑﺖ ﻭﺍﺣﺪﺓ ﺑﺲ .. ﺍﺳﻤﻬﺎ ﺍﻟﻨﺴﻴﻢ .. ﻣﺎﻋﻨﺪﻭ ﻏﻴﺮﻫﺎ .. ﻭﺍﻟﺒﺖ ﻛﺎﻧﺖ ﺍﻳﺔ ﻓﻲﺍﻟﺠﻤﺎﻝ .. ﻭﺍﻱ ﺯﻭﻝ ﻓﻲ ﺍﻟﺤﻠﺔ ﺩﺍﻳﺮ ﻳﺘﺰﻭﺟﻬﺎ .. ﻭﺍﻟﺒﻠﺪ ﻛﻠﻬﺎ ﺑﺘﺘﻜﻠﻢ ﺑﻴﻬﺎ .. ﻭﺩ ﺍﺭ ﺍﻟﺰﻳﻦ ﻗﺎﻟﻮ ﺍﻟﺒﺖ ﻣﻦ ﻋﻤﺮﻫﺎ ﺑﻘﻰ 12ﺳﻨﺔ .. ﻣﻨﻌﻬﺎ ﺍﻟﻤﺮﻭﻕ ﻣﻦ ﺍﻟﺒﻴﺖ .. ﻋﺸﺎﻥ ﻣﺎﻳﺸﻮﻓﻮﻫﺎ .. ﺍﻟﻨﺎﺱ ﻭﻳﺪﻭﻫﺎ ﻋﻴﻦ ﻳﻠﺤﻘﻮﻫﺎ ﺍﻟﻐﺘﺲ .. ﻭﺩ ﺩﺍﺭ ﺍﻟﺰﻳﻦ ﺍﻟﺰﻭﻝﺍﻟﻮﺣﻴﺪ ﻓﻲ ﺍﻟﺤﻠﻪ ﺍﻟﺒﺎﻧﻲ ﺑﻴﺘﻮ ﺑﺎﻟﺤﺠﺮ .. ﺍﻏﻠﺒﻴﺔ ﺍﻟﻨﺎﺱ ﺑﻴﻮﺗﻬﺎ ﺑﺎﻟﻘﺶ .. ﻭﺩ ﺩﺍﺭ ﺍﻟﺰﻳﻦ ﻋﻨﺪﻭ ﻛﻠﻤﺔ ﺣﺘﻰ ﻓﻲ ﺍﻟﺒﻼﻁ ﺍﻟﻤﻠﻜﻲ ﻓﻲ ﺳﻨﺎﺭﺟﻮﻩ .. ﻛﻞ ﻳﻮﻡ ﺳﺒﺖ ﺑﻤﺸﻲ ﻳﺤﻀﺮ ﻣﺠﻠﺲ ﺍﻟﺸﻮﺭﻯ ﻣﻦﺍﻟﺼﺒﺎﺡ .. ﻳﻌﻨﻲ ﻣﻤﻜﻦ ﺗﺴﻤﻴﻬﻮ ﻧﺎﻳﺐ ﺩﺍﻳﺮﺓ .. ﺯﻭﺟﺘﻪ ﺍﻟﺘﺎﻳﺔ ﺑﺖ ﻣﺨﺘﺎﺭ .. ﺑﺮﺿﻬﺎ ﺍﺑﻮﻫﺎ ﻛﺎﻥ ﺭﺍﺟﻞ ﻣﻦ ﺍﻫﻞﺍﻟﺴﻌﻴﺔ .. ﻳﻌﻨﻲ ﻋﻨﺪﻭ ﺑﻬﺎﻳﻢ ﻛﺘﻴﺮﺓ …

ﺍﻫﺎﺍﻟﻨﺴﻴﻢ ﻛﻞ ﻣﺎﺗﻤﺮ ﻋﻠﻴﻬﺎ ﺳﻨﺔ .. ﺑﺘﻤﺸﻲ ﺯﺍﻳﺪﺓ ﻓﻲ ﺍﻟﺠﻤﺎﻝﺑﻄﺮﻳﻘﺔ ﻣﺪﻫﺸﺔ .. ﻗﺎﻟﻮ ﺍﻟﺤﺮﻳﻢ ﺑﺠﻦ ﻣﻦ ﺍﻟﻘﺮﻯ ﺍﻟﺒﻌﻴﺪﺓ ﻣﺨﺼﻮﺹ ﻋﺸﺎﻥ ﻳﺸﻮﻓﻦ ﺍﻟﻨﺴﻴﻢ .. ﻗﺎﻟﻮ ﻳﺎﺧﻲ ﺍﻟﺸﺎﻓﻊ ﻛﺎﻥ ﺑﺒﻜﻲ .. ﻭ ﺍﻣﻮ ﻗﺎﻟﺖ ﻟﻴﻬﻮ ﻛﺎﻥ ﺳﻜﺖﺑﻮﺩﻳﻚ ﺗﺸﻮﻑ ﺍﻟﻨﺴﻴﻢ ﺑﺴﻜﺖ .. ﺍﻟﻨﺴﻴﻢ ﻭﻛﺖ ﺑﻘﺖ ﻋﻤﺮﻫﺎ 17 ﺳﻨﺔ .. ﺍﻱ ﺭﺍﺟﻞ ﻓﻲ ﺍﻟﺪﻧﻴﺎ ﻳﺘﻤﻨﻰ ﻳﺸﻮﻓﻬﺎ ﻟﻮ ﻣﺮﺓﻭﺍﺣﺪﺓﻭﺍﻟﺮﺟﺎﻝ ﺍﻟﺸﺎﻓﻮﻫﺎ ﻛﻠﻬﻢ ﺷﺎﻓﻮﻫﺎ ﻗﺒﻞ ﺍﻟﺒﻠﻮﻍ .. ﻟﻜﻦﺍﻟﺤﺮﻳﻢ ﻣﺎﺑﻘﺼﺮﻥ ﺑﺘﻜﻠﻤﻦ ﻋﻦ ﺍﻟﻨﺴﻴﻢ ﻭﺍﻟﻮﺍﺣﺪﺓ ﺑﺘﺘﻜﻠﻢ ﻋﻨﻬﺎ ﻻﻣﻦ ﺗﺸﺮﻕ ﻭﺗﺠﻴﻬﺎ ﻗﺤﺔ .. ﻳﻮﻡ ﻗﺎﻟﻮ ﻓﻲ ﻭﺍﺣﺪ ﺳﻜﺮﺍﻥ ﺍﺳﻤﻮ ﻭﺩ ﺍﻟﺴﻴﺪ ﺩﺍ ﻳﺘﺮﺗﺢ ﺑﻲﻋﻨﺪ ﺑﻴﺖ . ﻭﺩﺍﺭ ﺍﻟﺰﻳﻦ .. ﻭﻓﺘﺢ ﺍﻟﺒﺎﺏ ﻭﺩﺧﻞ ﻋﻠﻰ ﻏﻴﺮ

ﻭﻋﻴﻮ .. ﻻﻧﻮ ﻟﻮ ﺑﻘﻰ ﻭﺍﻋﻲ .. ﻣﺎ ﺑﺪﺧﻞ ﺑﻜﻮﻥ ﻋﺎﺭﻑ ﺍﻟﺤﻜﺎﻳﺔ ﺩﻱ ﻓﻴﻬﺎ ﻗﻄﻊ ﺭﺍﺱ .. ﻗﺎﻟﻮ ﺍﻟﺰﻭﻝ ﺩﻩﺟﺎ ﻭﺍﻗﻊ ﻓﻲ ﺍﻟﺤﻮﺵ .. ﻭﺍﻟﻨﺴﻴﻢ ﺟﺎﺕ ﻣﺎﺭﻗﺔ ﻣﻦ ﺍﻭﺿﺘﻬﺎ .. ﻭﻗﺎﻟﺖ ﻟﻴﻬﻮ ﺳﺠﻤﻲ ﻣﺎﻟﻚ؟ ﻭﺍﻧﺖ ﻣﻨﻮ ﻭﺍﻟﺠﺎﺑﻚ ﻫﻨﺎ ﺷﻨﻮ؟ ..

ﻳﺎﺯﻭﻝ ﺍﻟﺴﻜﺮﺍﻥ ﺩﻩ ﻋﺎﻳﻦ ﻟﻴﻬﺎ ﻛﺪﻱ ﻓﻲ ﻭﺷﻬﺎ .. ﺳﻜﺮﺗﻮ ﻓﻜﺖﻭﻗﻌﺪ ﻋﻠﻲ ﺣﻴﻠﻮ ﻭﻣﺠﺤﻢ ﻓﻴﻬﺎ ﻭﺑﻘﻰ ﺯﺍﺣﻲ ﻟﻲ ﻭﺭﺍ .. ﻭﻣﺮﻕ ﻣﻦ ﺍﻟﺒﻴﺖ ﻭﻫﻮ ﺑﺰﺡ ﺑﺎﻟﻮﺍﻃﺔ ﻭﻻﻣﻦ ﻣﺮﻕ ﻣﻦ ﺍﻟﺒﺎﺏﻣﺎﻗﺪﺭ ﻗﺎﻡ ﻋﻠﻰ ﺣﻴﻠﻮ ﻭﻻ ﻗﺪﺭ ﻳﺼﺮﻑ ﻧﻈﺮﻩ ﻣﻨﻬﺎ .. ﺍﻟﺰﻭﻝ ﺩﻩ ﻗﺎﻟﻮ ﻋﻴﺎ ﻋﺪﻳﻞ ﺑﻲ ﺣﺐ ﺍﻟﻨﺴﻴﻢ .. ﻭﻗﺎﻝ ﻓﻴﻬﺎﺷﻌﺮ ﻋﺠﻴﺐ ﻭﻏﺮﻳﺐ ﺍﻟﻨﺎﺱ ﺣﺎﻓﻈﻨﻮ ﻟﻲ ﺯﻣﻦ ﻗﺮﻳﺐ ﺩﺍ .. ﺷﺘﻠﺔ ﻣﻨﺼﺢ ﺍﻟﻮﺍﺩﻱ ﺍﻟﻤﺮﺿﻨﻲ ﺳﻤﺎﺣﺎ .

ﺻﺎﺍﺍﺍﺍﺡ ﻳﺎﺧﻠﻲ ﺣﺴﻴﺖ ﻋﻘﺮﺑﺎ ﺍﻟﻨﺘﺎﺣﻪ .

ﻣﻦ ﻳﻮﻣﻲ ﺍﻟﺮﻣﺎﻧﻲ ﺷﻘﺎ ﺍﻟﻌﻤﺮ ﻓﻲ ﺍﻟﺴﺎﺣﻪ .

ﻻ ﺯﺍﺭﺗﻨﻲ ﺻﺤﻪ ﻭﻻ ﻣﻠﻜﺘﺎ ﺍﻟﺮﺍﺣﻪ .

ﺍﺑﻮﻫﺎ ﺳﻤﻊ ﺑﻲ ﻗﺼﺔ ﻭﻗﻌﺔ ﻭﺩ ﺍﻟﺴﻴﺪ ﻓﻲ ﺑﻴﺘﻮ .. ﻭﺳﻤﻊ ﻣﻦ ﺷﻌﺮﻭ ﻓﻮﻕ ﺍﻟﻨﺴﻴﻢ . ﻗﺎﻡ ﻣﺸﻰ ﻟﻴﻬﻮ ﺷﺎﻳﻞ ﺳﻴﻔﻮ .. ﻣﺸﻰ ﻟﻴﻬﻮ ﻓﻲ ﻧﺺ ﺍﻟﺴﻮﻕ ﻭﻗﺎﻝ ﻟﻴﻬﻮ .. ﻛﻠﻤﻮﻧﻲ ﻭﺍﻟﺨﺒﺮ ﻣﻼ

ﺍﻟﺤﻠﺔ ﻗﺎﻟﻮ ﺍﻟﺨﻤﺮﻩ ﺭﻣﺘﻚ ﻓﻲ ﺑﻴﺘﻲ .. ﻭﻋﻠﻲ ﺍﻟﻄﻼﻕ ﺍﻛﺎﻥ ﻣﺎﻙ ﺳﻜﺮﺍﻥ ﺍﻻ ﺍﺳﻘﻲ ﺳﻴﻔﻲ ﺩﻩ ﺑﻲ ﺩﻡ ﻓﻘﺮﺗﻚ .. ‏( ﻳﻌﻨﻲ ﺍﻗﻄﻊ ﺭﺍﺳﻚ ‏( ..

ﻭﻛﺪﻱ ﺗﺎﻧﻲ ﺍﻟﻨﺴﻤﻌﻚ ﺟﺒﺖ ﺳﻴﺮﺓ ﺍﻟﻨﺴﻴﻢ ﻓﻲ ﻏﻨﺎﻙ .. ﺍﻭﻝ ﻣﺎﻓﺎﺕ ﻣﻨﻮ .. ﻭﺩ ﺍﻟﺴﻴﺪ ﺍﻧﺘﻜﻰ ﻋﻠﻰ ﻛﻮﻋﻮ ﻓﻮﻕ ﺷﻮﺍﻝﻛﺎﻥ ﻓﺎﺭﺷﻮﻭﻗﺎﻝ ..

ﺟﺎﻧﻲ ﺍﻻﺳﺪ .. ﻧﻬﻬﺮﻧﻲ ﺯﻳﻦ ..

ﻭﻭﺻﻔﻨﻲ ﺑﻲ .. ﻭﺩ ﺍﻟﺤﺮﺍﻡ ..

ﺑﻬﺪﻟﻨﻲ ﻓﻲ ﺍﻟﺴﻮﻕ ﺍﻟﻜﺒﻴﺮ ..

ﻗﺎﻝ ﻟﻲ ﺍﻭﻋﻚ .. ﻳﺎﺏ ﺳﻨﺎﻡ

ﻳﻮﻡ ﺗﺎﻧﻲ ﻣﻦ .. ﺍﺳﻤﻊ ﻏﻨﺎﻙ ..

ﻓﻮﻕ ﺍﻟﻨﺴﻴﻢ .. ﺳﺎﻣﻊ ﺍﻟﻜﻼﻡ . ؟ .

ﻭﺍﻧﺎ ﻓﻲ ﺍﻟﻨﺴﻴﻢ ﺑﺎﻛﻲ ﻭﻋﻠﻴﻞ .

ﺍﻧﺎ ﺑﻲ ﺍﻟﻨﺴﻴﻢ .. ﺭﺍﻗﺪ ﺣﻄﺎﻡ .

ﺍﻟﺒﺎﻗﻴﻪ ﻟﻲ ﺟﺴﻤﻲ ﺍﻟﻤﺮﺽ ..

ﻭﺍﻟﺒﺎﻗﻪ ﻧﻴﺮﺍﻥ ﻓﻲ ﺍﻟﻌﻀﺎﻡ ..

ﺍﻭﻝ ﻣﻦ ﺍﻟﻨﺎﺱ ﻭﺻﻠﻮ ﺍﻟﺨﺒﺮ ﻟﻲ ﻭﺩ ﺩﺍﺭ ﺍﻟﺰﻳﻦ ﺷﺎﻝ ﺳﻴﻔﻮﻭﻣﺸﻰ ﻛﺎﻳﺲ ﻟﻲ ﻟﻲ ﻭﺩ ﺍﻟﺴﻴﺪ ﺗﺎﻧﻲ .. ﺍﻟﻨﺎﺱ ﻣﺴﻜﻮﻫﻮﻭﻗﺎﻟﻮ ﻟﻴﻬﻮ ﺍﻧﺖ ﺭﺍﺟﻞ ﻋﻤﺪﺓ ﻗﺒﺎﻳﻞ ,, ﻣﺎﺗﻮﺳﺦ ﺳﻴﻔﻚ ﺑﻲ

ﺩﻡ ﺍﻟﺴﻜﺮﺍﻥ ﺧﻠﻮ ﺍﻟﻨﺴﻴﻢ ﺑﺮﺍﻫﺎ ﺑﺘﻜﺘﻠﻮ .. ﻭﻓﻌﻼ ﺍﻟﺮﺍﺟﻞ ﻣﺎﺕ ﺑﺎﻟﻌﺸﻖ ﻭﺍﻟﻐﺮﺍﻡ ﻓﻮﻕ ﺍﻟﻨﺴﻴﻢ .

ﺍﻟﻤﻬﻢ ﺍﻟﻨﺴﻴﻢ ﻛﺎﻧﺖ ﻗﺼﺼﻬﺎ ﺍﻛﺘﺮ ﻣﻦ ﺍﻟﺰﻭﻝ ﻳﺘﺬﻛﺮﻫﺎ ﻛﻠﻬﺎ .. ﻭﺩ ﺩﺍﺭ ﺍﻟﺰﻳﻦ ﻛﺎﻥ ﺧﺎﻳﻒ ﻋﻠﻴﻬﺎ ﻣﻦ ﻳﺸﻮﻓﻮﻫﺎ ﺍﻟﻮﺯﺭﺍﻭﺍﻻﻣﺮﺍﺀ .. ﻻﻧﻬﻢ ﺑﻘﻠﻌﻮﻫﺎ ﻣﻦ ﻋﻴﻨﻮ .. ﺍﻟﺰﻣﻦ ﺩﺍﻙ ﻛﺎﻥ ﺍﻟﻈﻠﻢ ﻣﺘﻔﺸﻲ ﺑﻄﺮﻳﻘﺔ ﻏﺮﻳﺒﺔ .. ﺍﻫﺎ ﻳﺎﺯﻭﻝ ﻓﻲ ﻳﻮﻡ ﻣﻦ ﺫﺍﺕ ﺍﻻﻳﺎﻡ .. ﻭﺍﻟﻨﺎﺱ ﻣﺎﺭﻗﺔ ﻋﻠﻰ ﺍﻟﺰﺭﺍﻋﺔ ﻭﺍﻟﻤﺎﺷﻲ .. ﻣﻦﺻﺒﺎﺣﺎﺕ ﺍﻟﻠﻪ .. ﻓﻲ ﻣﺮﺍﺓ ﻣﻦ ﺣﺮﻳﻢ ﺍﻟﺤﻠﺔ ﺭﺍﻛﺒﺔ ﺣﻤﺎﺭﺗﻬﺎ ﻭﺳﺎﺩﺭﺓ ﻋﻠﻰ ﺍﻟﺒﻬﺎﻳﻢ .. ﺍﻟﻤﺮﺍﺓ ﺩﻱ ﻓﻲ ﺍﻟﺪﺭﺏ .. ﻻﻗﺖ ﺍﻟﺘﺎﻳﺔ

ﺑﺖ ﻣﺨﺘﺎﺭ .. ﺍﻡ ﺍﻟﻨﺴﻴﻢ ﻗﺎﻟﺖ ﻟﻴﻬﺎ ﻳﺎ ﺍﻡ ﺍﻟﻨﺴﻴﻢ ﺍﻧﺎ ﺑﻌﺪﻳﻦ ﺍﻟﻤﻐﻴﺮﺏ ﻛﺪﻱ .. ﺑﺠﻴﻚ

ﻋﻨﺪﻱ ﻣﻌﺎﻙ ﻏﺮﺩ ‏( ﻣﻮﺿﻮﻉ ‏( ..

ﻗﺎﻟﺖ ﻟﻴﻬﺎ ﺣﺒﺎﺑﻚ ﻳﺎﻣﺴﺮﻩ ﺍﻧﺎ ﻓﻲ ﺭﺟﺎﻙ ﻋﺎﺩ .. ﻭﻓﻌﻼ ﺍﻟﻤﻐﺮﺏ ﻣﺴﺮﺓ ﺟﺎﺕ ﻟﻠﺘﺎﻳﺔ ﻭﻗﺎﻟﺖ ﻟﻴﻬﺎ .. ﺍﻧﺎ ﺩﺍﻳﺮﻩ ﺍﻟﻨﺴﻴﻢ ﻟﻲ ﻭﻟﺪﻱ ﺍﻟﻨﻮﺭ .. ﺩﺍﻳﺮﺍﻙ ﺗﺸﺎﻭﺭﻱ ﻟﻲ ﺍﺑﻮﻫﺎ .. ﻭﻫﻮﺑﺮﺍﻫﻮ ﺑﻌﺮﻑ ﻭﻟﺪﻱ ﺍﻟﻨﻮﺭ ﻭﻓﺮﺍﺳﺘﻮ .. ﻗﺎﻟﺖ ﻟﻴﻬﺎ ﻋﺎﺩ ﻭﺍﻟﻠﻪ ﺍﻟﻨﻮﺭ ﻣﺎﻓﻴﻬﻮ ﻛﻠﻤﺔ ﻛﺪﻱ .. ﺍﻟﻨﺼﺒﺮﺍﻟﻴﺠﻲ ﺍﻟﺤﺎﺝﻣﻦ ﺩﻳﻮﺍﻥ ﺍﻟﺸﻮﺭﺓ ﻣﺸﻰ ﺳﻨﺎﺭ ﺍﻟﻤﺪﻳﻨﺔ .. ﺍﻫﺎ ﻳﺎﺯﻭﻝ ﺍﻭﻝ ﻣﻦ ﻣﺮﻗﺖ ﻣﺴﺮﺓ .. ﻭﺩ ﺩﺍﺭ ﺍﻟﺰﻳﻦ ﺟﺎ ﺭﺍﻛﺐ ﻗﻌﻮﺩﻭ .. ‏( ﺟﻤﻞ‏) .. ﻭﻗﺎﻝ ﻟﻲ ﺍﻟﺘﺎﻳﺔ .. ﺩﺣﻴﻦ ﺃﻟﺘﺎﻳﺔ ؟

ﻣﺴﺮﺓ ﺩﻱ ﺍﻟﺠﺎﺑﻬﺎ ﻫﻨﺎ ﺷﻨﻮ؟

ﻃﺒﻌﺎ ﺍﻟﺮﺍﺟﻞ ﺭﺍﺟﻞ ﺳﻴﺎﺳﻲ .. ﻭﺑﻔﻬﻤﻬﺎ ﻃﺎﻳﺮﺓ .. ﻗﺎﻟﺖ ﻟﻴﻬﻮ ﻭﺍﻟﻠﻪ ﻗﺎﻟﺖ ﺑﺘﺪﻭﺭ ﺍﻟﻨﺴﻴﻢ ﻟﻲ ﻭﻟﺪﻫﺎ ﺍﻟﻨﻮﺭ .. ﺍﻧﺖ ﺭﺍﻳﻚ ﺷﻨﻮ؟

ﻗﺎﻝ ﻟﻴﻬﺎ ﺩﻗﻴﻘﺔ ﺍﻟﻨﺪﻟﻲ ﺍﻟﻘﻌﻮﺩ ﻭﺍﺟﻴﻚ ‏( ﻳﻌﻨﻲ ﻳﻨﺰﻝ ﺍﻟﺴﺮﺝﻣﻦ ﺍﻟﺠﻤﻞ‏( ﻭﺟﺎﻫﺎ ﻣﺎﺷﻲ ﺯﻱ ﺍﻻﺳﺪ .

ﻗﻌﺪ ﻟﻴﻬﺎ ﻓﻮﻕ ﺍﻟﻌﻨﻘﺮﻳﺐ .. ﻗﺎﻝ ﻟﻬﺎ .. ﺍﺳﻤﻌﻴﻨﻲ ﻛﻮﻳﺲ ﻳﺎ ﺍﻟﺘﺎﻳﻪ .. ﻭﺍﺭﺧﻲ ﻟﻲ ﺍﺿﺎﻧﻚ .. ﺍﻟﻨﺴﻴﻢ ﺑﺘﻲ ﺩﻱ ﻳﺎﻫﺎ ﺑﺘﻲ ﻭﻳﺎﻫﺎ ﻭﻟﺪﻱ .. ﻭﻣﺎﻋﻨﺪﻱ ﻏﻴﺮﻫﺎ .. ﻭﺍﻧﺎ ﻭﻛﺖ ﺍﺩﻳﻬﺎ ﺩﺍﻳﺮ ﺍﺩﻳﻬﺎ ﺍﻟﺮﺍﺟﻞ ﺍﻟﺒﺴﻌﺪﻫﺎ ﻭﻳﻜﻮﻥ ﻟﻬﺎ ﺯﻱ ﺍﺑﻮﻫﺎ ﻭﺍﻣﻬﺎ .. ﺍﻧﺎ ﻣﺎﻛﺎﻳﺲ ﻟﻲ ﻟﻲ ﺭﺍﺟﻞ ﻓﺎﺭﺱ .. ﺍﻧﺎ ﻛﺎﻳﺲ ﻟﻴﻬﺎ ﺭﺍﺟﻞﻋﻨﺪﻭ ﺍﺧﻼﻕ .. ﻭﻗﻠﺒﻮ ﻛﺒﻴﺮ .. ﻭﻣﺎﻋﻨﺪﻱ ﻣﺎﻧﻊ ﺍﻥ ﺑﻘﻰ ﺍﻟﻨﻮﺭﺑﻮﻓﻲ ﺑﻲ ﺷﺮﻃﻲ ﺑﻌﺮﺳﻠﻮ ﺍﻟﻨﺴﻴﻢ ﻻﻗﺮﺵ ﻻﺗﻌﺮﻳﻔﺔ .. ﻗﺎﻟﺖ ﻟﻴﻬﻮ ﺷﺮﻃﻚ ﺷﻨﻮ؟ ﻗﺎﻝ ﻟﻴﻬﺎ ﺍﻧﺎ ﻋﻨﺪﻱ ﺣﺠﻞ ﺣﻖﺣﺒﻮﺑﺘﻲ .. ﺍﻡ ﺍﺑﻮﻱ .. ‏(ﺍﻟﺤﺠﻞ : ﻫﻮﺣﻠﻘﺔ ﺗﻠﺒﺴﻬﺎ ﺍﻟﻔﺘﺎﺓ ﻓﻲ ﻗﺪﻣﻬﺎ‏) ﻗﺎﻟﻮ ﺍﻟﺤﺠﻞ ﺩﻩ ﻓﻴﻬﻮ ﺳﺮ .. ﻭﻫﺴﻊ ﺍﻟﺤﺠﻞ ﺩﻩﻗﺎﻋﺪ ﻋﻨﺪ ﻭﻟﺪﻫﺎ .. ﻋﻤﻲ ﺍﻟﺒﺸﻴﺮ ﺩﻩ ﺫﺍﺍﺍﺗﻮ .. ﻭﻭﻟﺪﻫﺎ ﻗﺎﻝﺍﻟﺤﺠﻞ ﻓﻴﻬﻮ ﻟﻌﻨﺔ ..ﻭﺩﻓﻨﻮ ﻓﻲ ﻣﻜﺎﻥ ﻭﺍﺑﺎ ﻳﻮﺭﻳﻬﻮ ﻟﺰﻭﻝ .. ﺍﻟﺤﺠﻞ ﻣﺎﻓﻴﻬﻮ ﻟﻌﻨﺔ ﻭﻻﺷﻲ .. ﺍﻟﺤﺠﻞ ﻓﻴﻬﻮ ﺳﺮ .. ﻭﺍﻧﺘﻲﻋﺎﺭﻓﺔ ﻋﻤﻲ ﺍﻟﺒﺸﻴﺮ ﺯﻭﻝ ﺻﻌﺐ .. ﻭﺍﺧﻼﻗﻮ ﻓﻲ ﻃﺮﻑ ﻧﻌﺎﻟﻮ.. ﺍﻫﺎ ﺍﻧﺎ ﺩﺍﻳﺮ ﺯﻭﻝ .. ﻳﻘﺪﺭ ﻳﻘﻨﻊ ﻟﻲ ﻋﻤــــﻲ .. ﻳﻮﺭﻳﻨﻲ ﻣﻜﺎﻥ ﺍﻟﺤﺠﻞ .. ﺩﻓﻨﻮ ﻭﻳﻦ .. ﻓﻲ ﻣﺪﺓ ﻣﺎﺗﻔﻮﺕ ﺧﻤﺴﻄﺎﺷﺮ ﺻﺒﺎﺡ .. ﻛﺎﻥ ﺍﻟﻨﻮﺭﺩﻩ ﻗﺪﺭ ﺍﻗﻨﻊ ﻋﻤﻲ .. ﺍﻟﻨﺴﻴﻢ ﻣﺮﺗﻮ .. ﻭﺍﻥ ﺑﻘﻰ ﻣﺎﻗﺪﺭ .. ﺭﺑﻨﺎ ﻳﻘﺴﻢ ﻟﻮ ﺍﺧﻴﺮ ﻣﻨﻬﺎ .. ﺍﻧﺘﻲ ﺑﺲ ﺧﻠﻴﻬﻮ ﻳﺠﻴﻨﻲ ﻭﺍﻧﺎﺑﻮﺭﻳﻬﻮ .. ﻗﺎﻟﺖ ﻟﻴﻬﻮ ﺳﻤﺢ ﺁﺍﻟﺤﺎﺝ .. ﻟﻜﻦ ﺍﻧﺎ ﻗﺎﻳﻠﺔ ﺍﻥ ﺑﻘﻰ ﺩﻩﺷﺮﻃﻚ ﻳﺎﻫﺎ ﺍﻟﻨﺴﻴﻢ ﺍﻟﻘﻌﺪﺕ ﺑﻼ ﻋﺮﺱ .. ﻟﻜﻦ ﺍﻧﺎ ﺑﻤﺸﻲ ﻭﺍﻛﻠﻢ ﻣﺴﺮﺓ .. ﺗﺸﻮﻑ ﺭﺍﻳﻮ ﺷﻨﻮ ؟ ﺍﺻﻠﻮ ﺍﻱ ﺯﻭﻝ ﺑﻌﺮﻑ ﻋﻤﻚ ﺍﻟﺒﺸﻴﺮ ﻣﺎﺑﻘﺒﻞ ﺑﻲ ﻛﻼﻣﻚ ﺩﻩ . ﻗﺎﻟﻬﺎ ﻣﺨﻴﺮﻳﻦ ﺍﻧﺎ ﻃﻠﺒﺖ ﻟﻲ ﺯﻭﻝ؟؟ ﻭﻻ ﺭﺳﻠﺖ ﻟﻲ ﺯﻭﻝ؟؟ ..

ﺍﻟﻤﻬﻢ ﺗﺎﻧﻲ ﻳﻮﻡ ﻣﺸﺖ ﻛﻠﻤﺖ ﺍﻟﻤﺮﺓ ﻭﺍﻟﻤﺮﺓ ﻛﻠﻤﺖ ﻭﻟﺪﻫﺎ ﺍﻟﻠﻬﻮ ﺍﻟﻨﻮﺭ .. ﺍﻟﻨﻮﺭ ﻓﺎﺭﺱ ﻣﻦ ﺍﻟﻔﺮﺳﺎﻥ ﺍﻟﻤﻌﺮﻭﻓﻴﻦ ﻭﺯﻭﻝ ﺍﺳﺪ ﻗﺒﻴﻠﺔ ﻣﺎﻓﻲ ﻭﻻ ﻛﻠﻤﺔ .ﻗﺎﻝ ﻟﻴﻬﺎ ﻛﻮﻳﺲ ﺑﻤﺸﻲ ﻟﻜﻦ ﺍﻟﺮﺍﺟﻞ ﺍﻟﻌﺠﻮﺯ ﺍﻻﺳﻤﻮ ﺍﻟﺒﺸﻴﺮﺩﻩ ﺯﻭﻝ ﻟﺪﻳﺢ ﻭﻋﺪﻳﻢ ﺣﻴﺎ . ﻭﻣﺎ ﺍﻇﻨﻲ ﺍﺗﻔﻖ ﻣﻌﺎﻫﻮ .. ﻭﻻﺑﻘﺪﺭ ﺍﻋﺪﻱ ﻣﻌﺎﻫﻮ ﺍﻻﻳﺎﻡ ﺩﻳﻞ .. ﺩﻩ ﺯﻭﻝ ﻓﻘﺮ .. ﺍﻟﻤﻬﻢ ﻳﺎﺯﻭﻝ ﻣﺸﻰ ﻟﻴﻬﻮ ﻓﻲ ﺍﻟﺒﻴﺖ .. ﻋﻢ ﺍﻟﺒﺸﻴﺮ ﻗﺎﻋﺪ ﻓﻲ ﺍﻟﺒﻴﺖ ﺑﺮﺍﻫﻮ ﻻ ﻭﻟﺪ ﻻﺑﺖ .. ﻋﻨﺪﻭ ﺑﺖ ﻭﺍﺣﺪﺓ ﻣﻌﺮﺳﺔ ﺑﺘﺠﻴﻬﻮ ﺍﻟﺼﺒﺎﺡ ﻭﺍﻟﻤﺴﺎﺀ ﺑﺘﺠﻴﺐ ﻟﻴﻬﻮ ﺍﻻﻛﻞ ﻣﻦ ﺑﻴﺘﻬﺎ ﻭﺑﺘﻌﻤﻞ ﻟﻴﻬﻮ ﺧﺪﻣﺎﺗﻮ ﺍﻟﻀﺮﻭﺭﻳﺔ .. ﺍﻟﻤﻬﻢ ﺍﻟﻨﻮﺭ ﺟﺎﻫﻮ ﺳﻠﻢ ﻋﻠﻴﻬﻮ ﻭﻗﺎﻝ ﻟﻴﻬﻮ ﻳﺎﻋﻢ ﺍﻟﺒﺸﻴﺮ ﺍﻧﺎ ﺩﺍﻳﺮ ﺍﺧﺪﻣﻚ ﻣﺪﺓ ﺍﺳﺒﻮﻋﻴﻦ . ﻗﺎﻝ ﻟﻴﻬﻮ ﺣﺒﺎﺑﻚ ﻛﻠﻤﻨﻲ ﺑﻴﻚ ﻭﺩ ﺩﺍﺭ ﺍﻟﺰﻳﻦ ﻗﻮﻡ ﻏﺴﻞ ﻟﻲ ﺳﺮﻭﺍﻟﻲ ﺩﻩ ﻭﺳﻮﺍ ﻟﻲ ﺷﺎﻱ ..

ﻗﺎﻡ ﺍﻟﻨﻮﺭ ﻃﻠﻊ ﺍﻟﺴﺮﻭﺍﻝ ﻣﻦ ﻛﺮﺍﺏ ﺍﻟﻌﻨﻘﺮﻳﺐ .. ﻟﻘﺎﻫﻮﻭﺳﺨﺎﻥ ﻻﻣﻦ ﻳﺎﺑﺲ ﻳﻜﺮﻛﺐ .. ﻭﻓﻴﻬﻮ ﺭﻳﺤﺔ ﺗﺠﻴﺐ ﺍﻟﻄﺎﺵ .. ﻗﺎﻝ ﻓﻮﻕ ﺍﻟﻨﺴﻴﻢ .. ﻛﻠﻮ ﻳﻬﻮﻥ ﻭﻗﻌﺪ ﻳﻐﺴﻞ ﻓﻲ ﺍﻟﺴﺮﻭﺍﻝ ﻻﻣﻦ ﻧﻀﻔﻮ .. ﻭﻣﺸﻰ ﺳﻮﺍ ﻟﻴﻬﻮ ﺍﻟﺸﺎﻱ .. ﺍﻟﺮﺍﺟﻞ ﺍﻟﻌﺠﻮﺯ .. ﺿﺎﻕ ﺍﻟﺸﺎﻱ ﻛﺪﻱ ﻭﻛﺸﺤﻮ .. ﻗﺎﻝ ﻟﻴﻬﻮ ﺍﻟﺸﺎﻱ ﺩﻩ ﻣﺴﻴﺦ ﺗﻤﺴﺦ ﻋﻠﻴﻚ ﺣﻴﺎﺓ ﺍﻟﺪﻧﻴﺎ .. ﺍﻣﺸﻲ ﺳﻮﻱ ﺷﺎﻱ ﺗﺎﻧﻲ .. ﻗﺎﻝ ﻟﻴﻬﻮ ﻃﻴﺐ ﺩﻓﻘﺘﻮ ﻣﺎﻟﻚ؟ ﻣﺎﻛﺎﻥ ﺗﺼﺒﺮ ﻧﻄﻌﻤﻮ ﺯﻳﺎﺩﺓ .. ﻗﺎﻝ ﻟﻴﻬﻮ ﺍﻣﺶﺳﻮ ﺍﻟﺸﺎﻱ ﺗﺸﻮﻱ ﺧﺸﻤﻚ ﺁﻟﻔﻘﺮ .. ﻫﻬﻬﻪ ﺍﻟﻨﻮﺭ ﻗﺎﻝ ﻭﺍﻟﻠﻪ ﺍﻟﺮﺍﺟﻞ ﺩﻩ ﺍﻧﺎ ﺑﻘﻮﻡ ﺍﻛﻔﺘﻮ ﺑﻲ ﻣﺼﻴﺒﺔﺯﻣﺎﻥ .. ﺍﺟﻴﺐ ﺍﺟﻠﻮ .. ﺑﻌﺪ ﻣﺎ ﺍﻧﺘﻬﻰ ﻣﻦ ﺍﻟﺸﺎﻱ ﻟﻠﻤﺮﺓ ﺍﻟﺘﺎﻧﻴﺔ .. ﻋﻤﻚ ﺍﻟﺒﺸﻴﺮﺿﺎﻕ ﺍﻟﺸﺎﻱ ﻭﻗﺎﻝ ﻟﻴﻬﻮ ﺍﻳﻮﺓ ﻛﺪﻱ ﻳﺎﻫﻮ ﺩﻩ ﺍﻟﺸﺎﻱ ﺍﻟﻤﺠﻴﻪ .. ﻋﻠﻴﻚ ﺍﻟﻠﻪ ﺟﻮﺓ ﻓﻲ ﺍﻟﻤﺨﺰﻥ ﻓﻲ ﻋﻴﺶ‏( ﺫﺭﺓ‏) ﺟﻴﺒﻮ ﻏﺴﻠﻮﻭﺍﻗﻌﺪ ﺍﻃﺤﻨﻮ ﻟﻲ ﻛﻠﻮ .. ﻗﺮﻳﺐ ﺍﻟﻨﺺ ﺷﻮﺍﻝ .. ﻫﻬﻪﻭﺍﺳﺮﻉ ﺍﻃﺤﻨﻮ ﻗﺒﻞ ﺍﻟﻌﺼﺮ ﻋﺸﺎﻥ ﺍﻧﺎ ﺩﺍﻳﺮ ﻟﻲ ﻋﺼﻴﺪﺓ ﺑﺎﻟﻠﺒﻦ ﻓﻲ ﺍﻟﻌﺸﺎ .. ﺍﻟﻨﻮﺭ ﻃﻠﻊ ﺍﻟﻌﻴﺶ ﻣﻦ ﺟﻮﺓ ﻭﻏﺴﻠﻮﻭﻭﺍﺗﺤﺰﻡ ﻭﺑﺮﻙ ﻓﻮﻕ ﺍﻟﻤﺮﺣﺎﻛﺔ .. ﻭﻗﻌﺪ ﻳﻄﺤﻦ .. ﻭﻋﺠﻨﻮﻭﻋﻤﻞ ﺍﻟﻌﺼﻴﺪﺓ . ﻭﻭﻭﻭ ﻳﺎﺯﻭﻝ ﺑﺲ ﺍﻟﻤﻬﻢ ﻋﻤﻞ ﻋﻤﻞ ﺍﻟﺨﺪﻡﻭﺍﻟﻨﺴﻮﺍﻥ ﺑﺎﻟﺬﻟﺔ ﻭﺍﻻﻫﺎﻧﺔ .. ﺑﺎﻟﻠﻴﻞ ﺑﻌﺪ ﻣﺎ ﺍﻧﺘﻬﻰ ﻣﻦ ﺍﻟﺨﺪﻣﺔ .. ﻗﺎﻝ ﻟﻴﻬﻮ ﻳﺎﺣﺎﺝ ﻳﺎﺧﻲﺍﻧﺎ ﺑٍﺴﺄﻟﻚ ﻣﻦ ﺍﻟﺤﺠﻞ ﺩﻓﻨﺘﻮ ﻭﻳﻦ ؟؟

ﻗﺎﻝ ﻟﻴﻬﻮ ﻳﺪﻓﻨﻮﻙ ﺣﻲ .. ﺍﻭﻝ ﺍﻧﺖ ﻗﺎﻳﻞ ﺑﻜﻠﻤﻚ ﺑﻴﻬﻮ ﺍﻣﺶ ﺍﺣﻠﻢ ﺳﺎﻱ ﺗﺤﻠﻢ ﺑﺎﻟﺘﻤﺴﺎﺡ ﺍﻟﻴﺒﻠﻌﻚ ﺟﺐ .. ﺍﻧﺖ ﻣﺘﻴﻦ ﺟﻴﺖ ﻳﺎﻫﻮ ﻳﻮﻣﻚ ﺍﻟﻮﺍﺣﺪ ﺩﻩ؟ .. ﺍﻧﺖ ﻟﺴﻊ ﻣﺎﺷﻔﺖ ﺷﻲﺍﻫﺎ ﻳﺎﺯﻭﻝ ﺑﺎﻛﺮ ﻣﻦ ﺍﻟﺼﺒﺎﺡ ﺻﺤﺎﻫﻮ ﻟﻴﻚ ﺍﻟﺴﺎﻋﺔ 4 ﺻﺒﺎﺣﺎﻭﺍﻟﻮﺍﻃﺔ ﺑﺮﺩ ﻋﺠﻴﺐ .. ﻗﺎﻝ ﻟﻴﻬﻮ ﺍﻟﻨﻮﺭ ؟ ﺍﻟﻨﻮﺭ؟ ﻗﻮﻡﺍﺳﺘﺤﻤﻰ ﻣﻦ ﺭﻳﺤﺘﻚ ﺍﻟﻌﻔﻨﺔ ﺩﻱ .. ﻭﻏﺴﻞ ﻟﻲ ﺗﻮﺑﻲ ﺩﻩ ..

ﻋﻨﺪﻭ ﺗﻮﺏ ﺑﺘﺎﻉ ﺩﻣﻮﺭﻳﺔ .. ﻗﺎﻝ ﻟﻴﻬﻮ ﻋﻠﻴﻚ ﺍﻟﻠﻪ ﻳﺎﺣﺎﺝ .. ﻭﺍﻟﻠﻪ ﺍﻟﻨﺴﻴﻢ ﺩﻱ ﻟﻮ ﺑﻘﺖ ﺍﻟﺠﻨﺔ ﺍﻧﺎ ﻣﺎ ﺩﺍﻳﺮﻫﺎ ﺍﻟﻠﻪ ﻳﻘﻄﻌﻚ ﻭﻳﻘﻄﻊ ﺍﻟﻨﺴﻴﻢ .. ﻭﻃﻠﻊ ﻃﻮﺍﻟﻲ .. ﻣﺸﻰ ﻻﺧﺘﻪ ﻗﺎﻝ ﻟﻴﻬﺎ ﺍﺻﻠﻮ ﺷﻨﻮ ﻳﻌﻨﻲ؟

ﻭﺍﻟﻠﻪ ﺍﻧﺎ ﻣﻦ ﺍﻟﻠﻪ ﺧﻠﻘﻨﻲ ﻣﺎﻓﻲ ﺯﻭﻝ ﺫﻻﻧﻲ ﻗﺪﺭ ﺩﻱ .. ﻣﺴﺮﺓﻣﺸﺖ ﻟﻲ ﺍﻟﺘﺎﻳﻪ ﻗﺎﻟﺖ ﻟﻴﻬﺎ ﻳﺨﺘﻲ ﺑﺘﻚ ﺍﻟﻤﻐﻠﻨﻬﺎ ﻭﻣﻌﻠﻨﻬﺎ ﺩﻱ .. ﺧﻠﻴﻨﺎﻫﺎ ﺍﻥ ﺷﺎﺀ ﺍﻟﻠﻪ ﺗﻠﻘﻰ ﺍﻟﺮﺍﺟﻞ ﺍﻟﺒﻐﺴﻞ ﻟﻠﺒﺸﻴﺮ

ﺳﺮﻭﺍﻟﻮ .. ﺍﻟﺨﺒﺮ ﺍﻧﺘﺸﺮ ﻭﺍﻟﻨﺎﺱ ﻛﻠﻬﺎ ﺳﻤﻌﺖ ﺑﺎﻟﻘﺼﺔ ﺩﻱ .. ﻭﻗﺎﻟﻮ ﺍﻱﺯﻭﻝ ﺩﺍﻳﺮ ﻳﻌﺮﺱ ﺍﻟﻨﺴﻴﻢ ﺍﻟﻔﺮﺻﺔ ﻗﺪﺍﻣﻮ ﻳﻌﺮﻑ ﺍﻟﺴﺮ ﺍﻟﻌﻨﺪ ﺍﻟﺒﺸﻴﺮ .. ﻭﺍﻟﺒﺸﻴﺮ ﻣﻌﺮﻭﻑ ﺯﻭﻝ ﻏﺘﻴﺖ .. ﺍﻟﻨﺸﻮﻑ ﺍﻟﻀﺤﻴﺔ ﺍﻟﺠﺎﻳﺔ ﻣﻨﻮ؟

ﺍﻟﻰ ﺍﻟﻠﻘﺎﺀ

Comments

comments

Print Friendly, PDF & Email

قم بكتابة اول تعليق

Leave a Reply

لن يتم نشر بريدك الالكتروني في اللعن