يوميات سائق امجاد

قصص قصيرة

⁠⁠⁠⁠⁠يوميات سائق امجاد ?

عندنا جارتنا في الحلة مرة صعبة خلاص ، النوع البشاكل ضلو داك ، ومرة معقدة جنس عقد ، الحلة كلها بتعمل حسابا منها . اها انا بتذكر اول ما اشتريت الامجاد دي مرة جيت ماري بي جنب بيتهم لقيتا بتكشح ليها في موية قمتا سلمتا عليها قلتا ليها
ازيك يا حجة
قالت لي : تحج في جمل اعور يا ود نجوي ولا خلاص ركبتا ليك عربية عايز تتبجح ؟ قادر الله امك تيابا اتشرطت من ركوب الحافلات وبص الوالي . بسسسسسس عليك
غايتو استغفرت وما رديت ليها ومشيت في دربي

اهاا في يوم كدة قاعد بدور في العربية اشوف ليك المرا جايه علي
حوالينا وما علينا
وجعلنا من بين ايديهم سدا ومن خلفهم سدا
يااااااخ يا الله الفقر الجانا شنو
باغتتني ليك طوالي عندي مشوار
قلتا ليها كدي يا امي قولي السلام عليكم !!!!!
يما تشقك وامي دي شنو
رضعتك ولا غسلت وسخك
هو انا بلد لي تور قدرك كدة
قلتا في سري المرا دي ما اجاريها واحاول بس اتخارج منها
قلتا ليها جدا ماشة وين ؟
قالت لي ماشة الاملاك لي عن ناس السر اخوي عرس بتو ،
تمام
توديني وتجي بكرة ترجعني واوعك تعمل لي حركات بتاعين الامجاد تشرني ، لازم تجيني تجيك الطاوية حبالا .
اها مشينا ليك بحري ونزلتها ليك بيت العرس قبل اتحرك جا اخوها عم السر الا انزل افطر ، وانا ما بين تحانيس عم السر وانا عايز اتخارج نطت قالت لي انزل لقيت ليك فطرة مجاني
ياااخ انا قربت ابوس يدها اقوليها يا شيخة ارحمينا
المهم نزلت فطرت وشربت لي كباية شاي ساااااادة خففت علي لماضة المرا وانا طالع كدة عم السر قالي عليك الله يا احمد يا ولدي بكرة الصباح بدري عايزك تجيني ، النسوان المطرطشات ديل عندهن فطور عريس وادنو ، تجي تسوقن وانا مكلم بتاع بكسي يرفعو في الحاجات ،
قلتا ليك خير ان شاء الله ماف مشكلة .
اها جا تاني يوم بعداك الواطة اصبحت غسلت العربية نضيف عشان خاطر عم السر وطلعت مشيت بحري بيت المناسبة ، اتلملمو النسوان والشفع رفعو ليك حلل الاكل وصواني كوور العصيدة والفطير
اها يا عم السر نتحرك ؟؟
استني خلي سعاد اختي تمرق
اللهم لا نسالك رد القضاء ولكن نسالك اللطف فيه
النسوان الوراي زاتو بقو يكوركو
يا جماعه نادو سعاد
كدي ي بتاع الامجاد دق ليها بوري
ي السر زمن الفطور جا خش لي سعاد
يا بت امشي استعجلي خالتك سعاد دي
اهاا نص ساعه كدة جات ليك لابسا ليها كعب عالي وماشية زي الزول الماشي في حجار وسط موية المطرة
مالكن ي نسوان بتكوركو ومستعجلات
لاحقات امتحان ؟
وانت ي قشور مالك بتضرب في البوري زي السايق اسعاف ؟

المهم مشينا ليك بيت العريس شايل النسوان والفطور ودخلنا ضيفونا ، ولمن بقت علي الرجعه اي مرا جات ادوها كيس هدايا ظريف ، بس علي التعترني وتعتر النسوان وعم السر وبت عم السر العروس والسودان وامريكا كيس الهدايا قطع في سعاد عمة العروس لانها اتاخرت تحكي لي اهل العرس وهم زاتهم حسب كلام بنتهم لي راجلا انو جايات خمسة نسوان وهي شلاقة ساي جات ذيادة وما محسوبة .
وحات اسم الله نحنا ركبنا الامجاد نرجف والعجب لمن واحدة فتحت كيسا ولقتو توب توتل يقول ي غربتي ودورت ليك فينا ردحي
نسابة التابه واليابا الما عرفو يقيمونا
عاد الخريف من رشتو والعريس من احترامو وتقييمو لي اهل نسابتو
غايتو وقعة سودا ونسابا اسود
ياخ نحنا لغاية ما رجعنا المرا دي ردحت ردحي يستر جنازة
اها اول ما وصلنا والنسوان نزلو طوالي قالت لي استنا راجعه معاك ،
اها الزولة دي نزلت ليك سريع سريع خشت لي جوة وجابت ليك شنطة شالت معاها اول م جات وختتا في العربية ، خلت ليك بيت العرس دة ما فاهم اي شي والنسوان ديل وراها يا سعاد عاد دة كلام دة تفوتي اخوك ؟؟
جا عم السر مخلوع بعد شافع مشي ناداهو من جنب ناس الجامع الجوهو بعد ختمة القران وقالو يصبحو عليهو
في شنو ي جماعة
الناس زاتا ما عارفة تقول لي عم السر في شنو !!
نطت هي
انا يا السر عرس بنتك ماني حاضراهو
ونسابة زي ديل ما بشرفني اقعد احضر ليهم جديد
ماناسبتا يا السر اخوي
بنتك كان اخير ليها القراية لكن ما شايفة ليها سعد
عم السر دة نطط عيونو قدر دة ولسه م فهم حاجة الا جرتو واحدة من النسوان حكت لي .
كدي يا سعاد اختي قولي بسم الله ورجعي الشنطة
يمين الله ما راجعه
الليلة العرس دة لو بقي لي عمرة وحج ما قاعدة
اها عم السر يحنس والناس دي مخلوعة في الشارع وقفت توسان فضية نزل ليك منها شاب ظريف كدة
السلام عليكم
عليكم السلام
عم السر سلم ليك علي الشاب بي حفاوة كدة
اوووو السيد خالد اخو العريس
اتفضل يا ابني
لا والله يا خال انا مستعجل بس معليش معاي وصية لي الخالة عمة العروس قبيل ناس البيت ما لحقو يدوها ليها وادا عم السر الوصية وركب عربيتو اتخارج ،
عم السر شال ليك الكيس فتحو لقي ليك توب وفتيل ريحة العنود وكيس فيهو بخور
اها يا سعاد تقولي لي نسابتي ما قيمووووك ؟
عيب عليك يا سعاد

طوالي هنا نطت قالت :

السر اخوي انت عندكم صبحية ولا ماف عشان اطير مع المعولق دة اجيب لي غيار واجي راجعه ؟؟ ??????

Merken

Merken

Print Friendly, PDF & Email

قم بكتابة اول تعليق

Leave a Reply

لن يتم نشر بريدك الالكتروني في اللعن